"Rhoihesse Doc" - Hans-Gerald Forg

Jostes ihr Leit…….. „Oh Du fröhliche“….. isses des werklisch ?

Wenn mer die Entwigglung vun de Covid-Erkronkte sieht sischer ned. Die Zahle nemme zu und immer mehr Leid ibberlebe des Ganze ned. Mer kimmt garnet mehr  dodezu on ebbes annerschter zu denke. In moine  Nachtdienschte hunn ich mehrere schwerkronke  Coronapatiente in die Klinik unn Intensivstatione fahrn müsse…..Unn weil es kää Intensivbedde in de Näh mehr gebt teilweise sunschtwohin.

„Oh Du selige“…. jo des isses werklisch !

Mer kumme widder dodozu uns uff das rischtische Woinachte zu besinne. Koi Riesenfete, sunnern des Fescht der Liebe, des mer diesmal werklisch nur mit unsere Liebste verbringe. Ohne Druck vun ausse  unn „ mer misse noch do un dort hin“. „Mer habbe den un die noch vergesse mit Besuch“.

Es ist dieses Johr werklisch ruhig. Selbst in dene Geschäfte is durch die Zugangsbeschränkunge noch ruhiges Oikaufe ohne Einzelkämpferausbildung meschlisch.

Mer sieht wer schon frieh on die Geschengge fer soi Liebschte gedenkt hot unn net uff de letzte Dricker. Gäbs kään Onlinehandel dann werdde Oinische ziemlisch bleed aus de Wäsch gugge. Abber Leit die des gonze Jahr on ihr Liebschte denke hunn joo ihr Geschenke schun gekaaft gehott.

Desdehalb versucht oifach emol des Fescht der Liebe als Fescht fer Eich zu geniesse. Ohne Trubel unn in Besinnlischkeit und Stille. So wie uns des eischentlisch gelehrt worrn is. Guudes Esse un Trinke, diesmal net in dde Wertschaft sunnern „homemade“.

Unn Kontakt zu eiernern Verwandte unn Freunde kennt er jo trotzdem halte. Grad in dene Zeite is es wischtisch, wonn ihr eierne äldere Herrschafte emol ooruft und net nur fraacht wie es dene geht sunnern eisch aach emol mit dene unnerhalt. Net aus Plichtebewusstsoin, sonnern aus Liebe und Respekt…

In eurem Sinne:
Bleibt gesund, halt Abstand unn traacht eiernen Schnuudelappe

Eiern Rhoihesse Doc

Zum Rhoihesse Doc: Hans-Gerald Forg betreibt seine Hausarztpraxis in Mainz-Marienborn.
Es handelt sich dabei um eine Schwerpunktpraxis für Schmerztherapie und Palliativmedizin, Forg ist Facharzt der Allgemeinmedizin; Notfall- und Palliativmedizin, FK Geriatrie, Tauchmedizin (GTÜM) und er betreibt suchtmedizinische und psychosomatische Grundversorgung, die Praxis ist eine Substitutionsstelle.
Seine Praxis wird regelmäßig zu den TOP5 in Mainz bei Jameda gewählt.
Seit 1999 ist Herr Forg leitender Notarzt des Kreises Alzey-Worms